د فارمسي مسلکي استاد

د بنسټ په اړه

د مورا ښوونیز او لوړو زده‌کړو ټولګې پېژندنه او ماموریت

د مورا ښوونیزه او تحصیلي ټولګه یو مخکښ بنسټ دی چې د لوړ کیفیت زده‌کړې او علمي غوره‌والي ته ژمن دی. زموږ ماموریت د نوو او نوښتګرو تدریسي لارو، هراړخیزو ښوونیزو پروګرامونو او ملاتړي، خوځنده او رغنده زده‌کړیز چاپېریال له لارې د محصلانو او زده‌کوونکو پیاوړي کول دي.

په مورا ټولګه کې وړکتون، ښوونځی، انستیتوت او پوهنتون شامل دي او هڅه کوي چې په بېلابېلو تعلیمي پړاوونو کې معیاري زده‌کړې او علمي او مسلکي ودې مناسب فرصتونه برابر کړي.

دا ټولګه ژمنه ده چې خپل علمي او عملي پروګرامونه د لوړو تعلیمي، علمي او څېړنیزو معیارونو سره سم طرح او تطبیق کړي او د نوو ښوونیزو لارو، معیاري امکاناتو او مسلکي استادانو په مرسته د محصلانو پوهه، مهارتونه، انتقادي فکر، خلاقیت او ټولنیز مسئولیت پیاوړی کړي.

مورا د علمي څېړنې، نوښت، عملي زده‌کړې او د نظري پوهې او د ټولنې د حقیقي اړتیاوو ترمنځ د اړیکو پر ودې ټینګار کوي، څو وړ، متخصص، اخلاقي او کاربازار ته چمتو فارغان وروزي چې د ټولنې په پرمختګ کې ونډه واخلي.

زموږ وروستۍ موخه د داسې غوره زده‌کړیز چاپېریال جوړول دي چې پکې د زده‌کړې کیفیت، علمي غوره‌والی، څېړنه، مسلکي اخلاق او د زده‌کوونکو هراړخیزه وده لومړیتوب ولري.

د دندې لنډیز

د دندې موخه

د فارمسي اړوندو مضمونونو اغېزمن تدریس، د محصلانو د نظري پوهې او عملي مهارتونو لوړول، د درملو د جوړولو، ترکیب، ساتنې، وېش او خوندي کارولو اصول ورښوول او د فارمسي پوهنځي په علمي، څېړنیزو او پرمختیايي چارو کې ونډه اخیستل.

۳. اساسي دندې او مسئولیتونه

الف) تدریسي دندې

1. د تایید شوي نصاب او درسي پلان له مخې د فارمسي مضمونونه تدریس کول.

2. د درسي پلان، سمستر پلان، لکچرونو، پریزینټېشنونو او ښوونیزو موادو برابرول.

3. د فارماکولوژۍ، فارماسیوتیکس، د درملو کیمیا، فارماکوګنوزي او نورو اړوندو علومو بنسټیز مفاهیم د استاد د تخصص له مخې تشریح کول.

4. د زده‌کړې او انتقادي فکر د پیاوړتیا لپاره محصل‌محوره معیاري تدریسي لارې کارول.

5. د بنسټ د رسمي مهال‌وېش مطابق درسونه پر مخ وړل.

6. محصلانو ته په مطالعه، د درسي ستونزو په حل او د مسلکي مهارتونو په لوړولو کې لارښوونه.

د علمي اخلاقو، اکاډمیک نظم او د تدریس د کیفیت معیارونه مراعات کول.

ب) عملي او لابراتواري دندې

• د فارمسي د عملي او لابراتواري فعالیتونو په ترسره کولو کې محصلانو ته لارښوونه.
• د علمي او مسلکي اصولو له مخې د درملو جوړول، ترکیب، پېژندنه، بسته‌بندي او ساتنه ورښوول.
• د وسایلو، کیمیاوي توکو، لابراتواري تجهیزاتو او نورو زده‌کړیزو امکاناتو پر خوندي استعمال څارنه.
• د حفظ‌الصحې، لابراتوار د خوندیتوب او د کثافاتو د خوندي دفعې اصول مراعات او ورښوول.
• د محصلانو د عملي راپورونو ارزونه او رغنده نظر ورکول.
• د تجهیزاتو، مصرفېدونکو توکو او د لابراتوار د نورو اړتیاوو کمښت اړوند مسئول ته راپورول.

ج) ارزونه او ازموینې

• د زده‌کړې موخو او تدریس شویو مضمونونو مطابق د ازموینو پوښتنې جوړول.
• د بنسټ د مقرراتو سره سم امتحانونه، کوېزونه، عملي ارزونې او د زده‌کړې نورې ازموینې اخیستل.
• د ازموینو پاڼې او د محصلانو فعالیتونه عادلانه او روڼ ارزول.
• نمرې په ټاکلي وخت ثبتول او اړوندې ادارې ته سپارل.
• د ازموینو پوښتنو، اسنادو او د محصلانو پایلو محرمیت ساتل.
• د محصلانو زده‌کړیزې ستونزې معلومول او د پایلو د ښه‌والي لارې وړاندیز کول.

د) څېړنیز او علمي فعالیتونه

• د فارمسي، درملو، د درملو د خوندیتوب او اړوندو موضوعاتو علمي څېړنې کول.
• محصلان څېړنې، علمي مقالې او راپورونه جوړولو ته هڅول.
• په سیمینارونو، کنفرانسونو، ورکشاپونو او د علمي ظرفیت لوړولو پروګرامونو کې ګډون.
• باوري علمي سرچینې مطالعه کول او د فارمسي د نوو پرمختګونو له مخې درسي منځپانګه تازه کول.
• له نورو استادانو سره د علمي موادو په جوړولو او تدریسي کیفیت په ښه کولو کې مرسته.

هـ) اداري او اکاډمیک دندې

• په علمي، ډیپارټمنټي او رسمي غونډو کې منظم ګډون.
• د کاري پلانونو، میاشتنیو او سمستري راپورونو او اکاډمیکو اسنادو په چمتو کولو کې همکاري.
• د مهال‌وېش، حاضرۍ، کورنیو مقرراتو او طرزالعملونو مراعات.
• د نصاب په بیاکتنه او د ښوونیزو پروګرامونو په کیفیت کې مرسته.
• د کیفیت ارزونې او اکاډمیک اعتبار ورکولو بهیر کې همکاري.
• د اړوندو مراجعو له خوا سپارل شوې نورې مسلکي او علمي دندې ترسره کول.

و) مسلکي اخلاق او مسئولیتونه

• د استادۍ اخلاقي اصول او له محصلانو، همکارانو او مراجعینو سره درناوی.
• له تبعیض، د صلاحیت له ناوړه ګټې او له اکاډمیکو اصولو خلاف چلند څخه ډډه.
• د محصلانو معلوماتو او رسمي اسنادو محرمیت.
• د درملو معقول، خوندي او مسئولانه استعمال ته وده ورکول.
• د مسلکي صلاحیت او نصاب مطابق د نسخې لوستلو، دوز محاسبې او د درملو د تداخل د ارزونې علمي اصول تدریسول.

د فارمسي په تدریس او عملي چارو کې نافذ قوانین مراعات کول.

• د نافذو مقرراتو او استخدامي معیارونو مطابق د فارمسي په رشته کې لږ تر لږه اړوند تحصیلي سند لرل.
• د فارمسي په تدریس یا درمل جوړولو کې مسلکي تجربه غوره ګڼل کېږي.
• د تدریس اړوند علمي موضوعاتو بشپړ تسلط.
• د درسي پلان، ښوونیزو موادو او د ازموینو د پوښتنو د جوړولو وړتیا.
• د کمپیوټر او برېښنايي علمي سرچینو کارولو مهارت.
• د اړیکو، تدریس، څېړنې او ډله‌ییز کار مهارتونه.

د اخلاقو، نظم او مسلکي مسئولیت اصول مراعاتول.