د بایومیډیکل تجهیزاتو تخنیکر

د دندې عمومي معلومات

بایومیډیکل تخنیکر باید په ICU (د جدي مراقبت څانګه) کې د طبي تجهیزاتو نصب، ساتنه، ترمیم او اغېزمن استعمال مدیریت کړي. هغه به د ICU له مسؤل او اړوندې ادارې سره په همغږۍ د تجهیزاتو د کار وړ ساتلو، دوامدارې ارزونې او تخنیکي ملاتړ یو سیستم جوړوي، ترڅو د ICU روغتیايي خدمتونه په معیاري او اغېزمنه بڼه وړاندې شي. دندې یې یوازې په دغو مواردو پورې محدودې نه دي.

د استخدام اړین شرایط او وړتیاوې

• د افغانستان تابعیت باید ولري.
• په بایومیډیکل، الکترونیک یا یوه بله اړونده تخنیکي رشته کې یې د فوق‌بکلوریا یا لیسانس سند ترلاسه کړی وي.
• په همدې برخه کې لږ تر لږه یو (۱) کال کاري تجربه ولري.
• د رسمي مکتوبونو د لیکلو وړتیا ولري او د Microsoft Office په Word، Excel او PowerPoint کې کار وکړای شي.
• د اغېزمنو اړیکو، خبرو اترو او افهام او تفهیم ښه مهارتونه ولري.
• د افغانستان پر یوې رسمي ژبې (پښتو یا دري) واکمن وي او له انګلیسي سره هم بلد وي.

دندې او مسئولیتونه

• د ICU د ټولو طبي وسایلو او تجهیزاتو تنظیم او دوامداره ساتنه او مراقبت.
• د طبي تجهیزاتو د ساتنې لپاره د معیاري اصولو او کړنلارو جوړول او پلي کول.
• د وسایلو د نصب، اسمبلۍ او تخنیکي عیارولو چارې ترسره کول، د تخنیکي اړتیاوو، ځای، تودوخې او کیبلونو د منظم ترتیب په پام کې نیولو سره.
• د ICU پر تجهیزاتو منظمه څارنه کول، د هغوی اغېزمن استعمال یقیني کول او ادارې ته د وضعیت راپور ورکول.
• د تخنیکي وسایلو د ترمیم چارې پرمخ وړل او د ساتنې او ترمیم رهنمودونه برابرول.
• د اړتیا پر مهال د ICU وسایل په څانګه کې ترمیمول او که اړتیا وي، له څانګې بهر د اصولو سره سم د ترمیم بندوبست کول.
• د ټولو طبي تجهیزاتو بشپړ لېست او مشخصات چمتو کول، لکه مخینه، د نصب نېټه، شرکت، تخنیکي معلومات او خراب وسایل.
• د وسایلو د پرزو او اړینو لوازمو لېست جوړول او د اړتیا پر وخت یې مرکزي دفتر ته استول.
• د هر ماشین د اړینو توکو او تخنیکي مشخصاتو ثبتول او د ترمیم، سرویس او بدلون لپاره پلان جوړول او عملي کول.
• د وسایلو د اغېزمنتیا د دوام او د خرابېدو د مخنیوي لپاره د نصب کیفیت، د خونې پراخوالی، مناسبه تودوخه، برېښنا او نور اړین شرایط مراعتول.
• له عمومي پلان سره سم میاشتني، ربعوار او کلني کاري پلانونه چمتو کول چې ټاکل شوې موخې ترلاسه شي.
• د چارو او لاسته راوړنو میاشتني، ربعوار، کلني او د اړتیا پر وخت راپورونه برابرول او اړوندې ادارې ته رسول.
• د طبي تجهیزاتو د سیستم د پرمختګ او ښه کېدو لپاره عملي او اغېزمن وړاندیزونه کول.
• میاشتنی تخنیکي راپور ترتیبول او د ادارې مسئولو کسانو ته یې سپارل.
• د مستقیم آمر له خوا سپارل شوې نورې اړوندې چارې ترسره کول.

بایومیډیکل تخنیکر خپل راپور د ICU د جدي پاملرنې څانګې مسئول ته ورکوي.

د غوښتنلیک سپارلو لار

قدرمن نوماندان کولی شي خپل CV په یاد شوي برېښنالیک واستوي، یا یې چاپ شوې نسخه د عامې روغتیا وزارت د کارکوونکو چارو ریاست د اعلانونو او کارموندنې عمومي مدیریت ته په لاس وسپاري.