د خدمتونو او تدارکاتو کارکوونکی

د بنسټ په اړه

د انسټیټیوټ پېژندنه

د افغانستان د بانکدارۍ او مالي چارو انسټیټیوټ (AIBF) د افغانستان بانک (مرکزي بانک) پورې اړوند بنسټ دی چې د ۲۰۲۵ کال په پیل کې فعال شوی او موخه یې د هېواد د مالي سکتور د کارکوونکو ظرفیت لوړول او مسلکي روزنه ده. دغه انسټیټیوټ د بانکونو، کوچنیو مالي مؤسسو (MFIs)، د برېښنايي پیسو مؤسسو (EMIs) او د پولي خدمتونو وړاندې کوونکو (MSPs) لپاره روزنیز او د ظرفیت لوړولو پروګرامونه طرحه او پلي کوي.

د دندې لنډیز

د بست موخه

د خدمتونو او تدارکاتو کارکوونکی د انسټیټیوټ د ټولو تدارکاتي او اداري خدمتونو د پلان جوړونې، تنظیم او څارنې مسئولیت لري. دغه بست ډاډ ورکوي چې د توکو او خدمتونو د پېرلو بهیر، د قراردادونو مدیریت او ورځني اداري خدمتونه (تسهیلات، ترانسپورت، پاکوالی، ترمیم او ساتنه) په روڼ، اغېزمن او د نافذه پالیسیو او کړنلارو سره سم ترسره کېږي.

د دندې مسئولیتونه

الف) تدارکاتي چارې:

• د انسټیټیوټ د بېلابېلو څانګو له اړتیاوو سره سم د کلني تدارکاتي پلان جوړول او پلي کول.

• د تدارکاتو له کړنلارې سره سم د توکو او خدمتونو د پېرلو بهیر څارل.

• د داوطلبۍ اسناد چمتو او اداره کول، د وړاندیزونو ارزونه او د قراردادونو تهیه او لاسلیک کول.

• د تدارکاتو په ټولو بهیرونو کې د روڼتیا، ازادې سیالۍ او د بودجې د اغېزمن لګښت اصولو مراعات یقیني کول.

• د انسټیټیوټ د فایل ساتنې له سیستم سره سم تدارکاتي ریکارډونه او اسناد ساتل او تازه کول.

• د توکو او خدمتونو د عرضه کوونکو او تأمین کوونکو فعالیت ارزول.

• د ورکړو د تعقیب او د بودجې د مطابقت لپاره له مالي څانګې سره نږدې همکاري.

ب) اداري خدمتونه:

• د انسټیټیوټ د ودانۍ، ترانسپورت، پاکوالي، امنیت او د تجهیزاتو د ساتنې په ګډون د تسهیلاتي خدمتونو څارنه.

• د انسټیټیوټ د تأسیساتو د ترمیم، رغونې او ساتنې چارې تنظیم او تعقیبول.

• د انسټیټیوټ ثابتې شتمنۍ اداره کول، په ګډون د ثبت، لېبل لګولو او د ګودام کنټرول.

• د انسټیټیوټ د روزنیزو او اداري فعالیتونو لپاره د ترانسپورت او لوژستیک تنظیم.

• د کارکوونکو، مراجعینو او د روزنیزو پروګرامونو د ګډونوالو لپاره د مناسب، خوندي او مجهز کاري چاپېریال تأمین یقیني کول.

• د تر لاس لاندې کارکوونکو (خدمتګاران، آشپزان، صفاکاران، ساتونکي او موټرچلوونکي) سرپرستي، لارښوونه او د کار ارزونه.

ج) نور مسئولیتونه:

• عمومي مدیر ته د تدارکاتي او خدماتي فعالیتونو میاشتني، درې‌میاشتني او کلني راپورونه برابرول.

• د تدارکاتو او اداري خدمتونو د داخلي پالیسیو او کړنلارو په ترتیب او بیاکتنه کې مرسته کول.

• د عمومي مدیر له خوا سپارل شوې نورې اړوندې دندې ترسره کول.

د ګمارنې شرطونه

زده کړې

لږ تر لږه د سوداګرۍ مدیریت، اقتصاد، لوژستیک مدیریت یا نورو څانګو څخه د لېسانس سند. په اړوندو څانګو کې د ماسټرۍ سند یو امتیاز ګڼل کېږي.

کاري تجربه

د سوداګرۍ مدیریت، اقتصاد یا لوژستیک مدیریت فارغان باید لږ تر لږه درې (۳) کاله اړونده تجربه ولري؛ د نورو څانګو فارغان باید پنځه (۵) کاله اړونده کاري تجربه ولري.

مهارتونه او وړتیاوې

• د افغانستان اسلامي امارت د تدارکاتو له کړنلارو او مقرراتو سره بلدتیا.

• د قراردادونو د مدیریت او د وړاندیزونو د ارزونې ښه مهارتونه.

• د رهبرۍ، سرپرستۍ او د ټیم د مدیریت مهارتونه.

• د کمپیوټر د کارولو ښه مهارتونه (MS Office، په ځانګړې توګه Word او Excel).

• د اړیکو، خبرو اترو او راپور ورکولو ښه مهارتونه.

• په پښتو او دري ژبو بشپړ تسلط؛ د انګلیسي ژبې ښه پوهه اړینه ده.

د غوښتنلیک د وړاندې کولو طریقه

وړ کسان کولای شي د اعلان تر وروستۍ نېټې خپل خلص سوانح (CV) د [email protected] برېښنالیک ته واستوي او [email protected] د برېښنالیک په کاپي کې واچوي. مهرباني وکړئ د برېښنالیک په موضوع (Subject) کې د بست عنوان «د خدمتونو او تدارکاتو کارکوونکی» ولیکئ. یوازې لنډ لېست ته غوره شوي کسان به لیکلې ازموینې او مرکې ته وبلل شي.