د څېړنې او پراختیا لوړپوړی مدیر

د ادارې په اړه

د افغانستان بانک د وزیرانو شورا د 152 شمېرې او 3/2/1318 نېټې تصویب، د ملي شورا د 11 شمېرې او 19/6/1318 نېټې تصویب، د مشرانو جرګې د 12/6/1318 تاریخي پرېکړې او د شاهي حضور د 5280/1317 منظورۍ چې نېټه یې 17/11/1318 وه، له مخې د یو سل او شل میلیونه افغانیو په لومړنۍ پانګه په کابل کې پرانیستل شو. بانک واک درلود چې په هېواد دننه او بهر خپل استازولي او څانګې جوړې کړي او سکتوري بانکونه وټاکي. د افغانستان بانکي نظام په 1312 هجري لمریز کال کې د افغان ملي بانک له جوړېدو سره راپیدا شو او تر د افغانستان بانک جوړېدو مخکې دولتي بانکداري همدې بانک پرمخ وړله. له جوړېدو وروسته دولتي بانکي مسؤلیتونه، د افغاني پیسو چاپ او خپرول هم، د افغانستان بانک ته ولېږدول شول. بانک د دولت د بانکدار او سوداګریز بانک په توګه د پیسو په چاپ او خپرولو او بانکي نظام کې مهم پرمختګونه ترلاسه کړل. د بانک فعالیتونه په دوو پړاوونو وېشل کېږي. لومړی پړاو له 1318 څخه تر 1380 کال پورې و؛ بانک د بازار د غوښتنې مطابق د افغاني پیسو د چاپ، سکې وهلو او خپرولو، د پیسو ارزښت د ساتلو او دولتي بانکدارۍ د چارو مسؤل و. سربېره پر دې یې لکه د نورو سوداګریزو بانکونو په څېر د سپما، جاري او میعادي حسابونو پرانیستل او د پانګونې او سوداګریزو فعالیتونو لپاره پورونه هم ورکول. دویم پړاو په 1381 کال پیل شو. د اساسي قانون له تصویب وروسته د دولسمې مادې پر بنسټ مرکزي بانک یو خپلواک بانک شو او د ورکړل شویو صلاحیتونو په مرسته یې په بېلابېلو برخو کې پام وړ لاسته‌راوړنې وکړې. د نویو مالي او بانکي قوانینو مطابق یې ټول سوداګریز کارونه دولتي او خصوصي بانکونو ته وسپارل او د بانکي او مالي مؤسسو د جواز ورکولو او څارنې مسؤلیت یې واخیست. د افغانستان بانک د قانون له مخې د بیو ثبات یې لومړنۍ او اساسي موخه ده. د دې لپاره د پولي او ارزي سیاستونو جوړول، پلي کول او غوره کول، د اسعارو ترتیبات، د بانکنوټونو چاپ او سکې وهل د مرکزي بانک دندې وټاکل شوې. بانک د دولت د بانکدار او مالي استازي په توګه، د بانکونو، صرافانو، د پولي خدمتونو وړاندې کوونکو او تضمیني اسنادو د جوازونو د صدور او ثبت مرجع او د خوندي او سالم تادیاتي سیسټم د چلولو مسؤلیت هم لري.

د دندې لنډیز

د دندې نوم: د څېړنې او پراختیا لوړپوړی مدیر

آمریت: د خطر مدیریت او د قانون رعایت عمومي آمریت

درجه: نهمه (۹)

د بستونو شمېر: یو (۱)

د پیل نېټه: ۰۵/۰۷/۱۴۰۵

د پای نېټه: ۱۹/۰۷/۱۴۰۵

د اعلان ډول: داخلي او بهرنی

د ګومارنې ډول: دایمي

دندې او مسؤلیتونه

· د کارکوونکو او څانګې د چارو مدیریت، څارنه، کنټرول او ارزونه، ترڅو د چارو د ښه کولو انګېزه، اغېزمنتیا او حاصل‌ورکونه لوړه شي، روزنیزې اړتیاوې وپېژندل شي او ظرفیتونه پیاوړي شي.

· د پالیسیو، مقرراتو، طرزالعملونو، لایحو او روڼو او حساب‌ورکوونکو معیاري سیسټمونو په جوړولو او پراختیا کې همکاري، د ستراتیژیکو او کاري پلانونو ترتیب او پلي کول او د تطبیق څارنه.

· د خطر مدیریت د پالیسۍ، د خطر ارزونې د چوکاټ، د قانون رعایت پالیسۍ او نورو نافذه لایحو او مقرراتو بشپړ پلي کېدل یقیني کول.

· د افغانستان بانک له اړوندو آمریتونو څخه د حقوقي خطر په اړه د راغلو مکاتباتو کره‌والی او کیفیت تاییدول.

· د پیسو مینځلو او ترهګرۍ د تمویل د مخنیوي د خطر مدیریت په پراختیا کې څېړنه او د خطر مدیریت او قانون رعایت د پرمختګونو په اړه کلني څېړنیز پروګرامونه جوړول.

· د تر لاس لاندې مدیرانو له خوا د څېړنیزو پروژو همغږي او څارنه.

· مستقیم مدیر او باصلاحیته آمر ته تر سپارلو مخکې د څېړنې او پراختیا د پایلو کره‌والی یقیني کول.

· د خطر مدیریت او د پیسو مینځلو او ترهګرۍ د تمویل پر ضد مبارزه کې نړیوال پرمختګونه او معیارونه څېړل او د افغانستان بانک په پالیسیو او طرزالعملونو کې یې شاملول.

· مستقیم مدیر او باصلاحیته آمر ته د څېړنې او پراختیا د پایلو دوامدار راپورونه وړاندې کول.

· د څېړنې او پراختیا د خطر د پالیسیو، طرزالعملونو او میتودولوژیو بیاکتنه، بشپړول او سمون.

· د پېژندل شویو خطرونو د کره‌والي، د څېړنې او پراختیا د خطر ارزونې د بهیر او د خطر کمولو د پلان د تعقیب یقیني کول، له اړوندو آمریتونو او تر لاس لاندې مدیرانو سره په همغږۍ.

· د خطر د منلو اشتها او د خطر د زغم د کچې د پلي کولو په اړه د افغانستان بانک د خطر مدیریت او قانون رعایت کمېټې ته ګټور نظرونه او سپارښتنې وړاندې کول.

· څېړنیز راپورونه (څېړنیزې مقالې) برابرول او د خطر مدیریت او قانون رعایت کمېټې ته یې وړاندې کول.

· د تر لاس لاندې مدیرانو د څېړنیزو موندنو کره‌والی یقیني کول.

· په روزنیزو پروګرامونو کې ګډون او د خطر د فرهنګ د خپرولو، پوهاوي او ظرفیت لوړونې روزنیز پروګرامونه د افغانستان بانک اړوندو کارکوونکو ته جوړول.

· د خطر مدیریت او د پیسو مینځلو او ترهګرۍ د تمویل پر ضد مبارزې په برخه کې له تر لاس لاندې مدیرانو سره د څېړنې او پراختیا همکاري.

· کاري پلانونه جوړول او مستقیم مدیر او باصلاحیته آمر ته د کار راپورونه وړاندې کول.

· نورې هغه دندې او مسؤلیتونه ترسره کول چې د طرزالعملونو، لارښوونو، لوړپوړو چارواکو د حکمونو، لایحو او مقرراتو سره سم ورسپارل کېږي.

تحصیلي درجه

• لږ تر لږه په اقتصاد، مدیریت، بانکدارۍ او مالي چارو، سوداګرۍ اداره، حقوقو، عامه اداره یا محاسبې کې لیسانس؛ په دغو برخو کې د ماسټرۍ سند لرونکو ته ترجیح ورکول کېږي.

تجربه

• د دندې اړوند څلور (4) کاله کاري تجربه.

مهارتونه او وړتیاوې

• د هېواد له رسمي ژبو او انګلیسي سره بلدتیا.

• مدیریتي مهارتونه.

• روانې خبرې او د دندې د محرمو معلوماتو ساتنه.

• د بانکي قوانینو، مقرراتو، او د افغانستان بانک د دندو او موخو پوهه.

• د لیکونو، وړاندیزونو او کاري راپورونو لیکلو وړتیا.

• د کاري مسؤلیت پوهه او د کار په چاپېریال کې د ستونزو پېژندل.

• د کمپیوټري پروګرامونو او بانکي سیسټمونو سره بلدتیا.

• د کاري موضوعاتو تحلیل، مالي چارو تفسیر او دقیق مالي راپور ورکولو وړتیا.

شخصي ځانګړتیاوې او ارزښتونه

• صداقت، ښه چلند، دوه اړخیز درناوی، نوښت، نظم، د دندې او وخت پابندي، ډله‌ییز کار ته لېوالتیا، همکاري، مسؤلیت‌پذیري، پرېکړه کول او مسلکیتوب.

یادونې

• لېوال نوماندان لومړی په jobs.dab.gov.af وېبپاڼه کې خپل حساب جوړولی شي، وروسته اړوند بست وټاکي او غوښتل شوي اسناد په PDF بڼه پورته کړي.

• د ازموینې لپاره یوازې له ټاکل شویو نوماندانو سره اړیکه نیول کېږي.

• د ازموینې نېټه به وروسته اعلان شي.