هرات کې ۳۰۰ ښځینه متشبثینو ته د بازارموندنې او مصنوعي ځیرکتیا روزنیز پروګرام پیل شو
د افغانستان او ایران د ګډې سوداګرۍ خونې د دواړو هېوادونو د ښځینه سوداګرو ترمنځ د ګډو سوداګریزو فعالیتونو د پیل خبر ورکړی دی. هممهاله هرات کې له ۳۰۰ څخه زیاتو ښځو ته د مصنوعي ځیرکتیا له لارې د بازارموندنې روزنه ورکول کېږي.
د افغانستان او ایران د ګډې سوداګرۍ خونه وايي چې د افغان او ایراني ښځینه سوداګرو ترمنځ به ډېر ژر ګډ سوداګریز فعالیتونه پیل شي. دغه خونه زیاتوي چې ښځې د دواړو هېوادونو په اقتصاد کې مهم رول لوبوي او د ګډو فابریکو په جوړولو سره به خپل تولیدات نورو هېوادونو ته صادر کړي.
د افغانستان او ایران د ګډې سوداګرۍ خونې غړې، ندا شیرین وویل: «ښځې باید د افغانستان او ایران ترمنځ په سوداګرۍ کې هم رول ولري ترڅو وکولای شي د خپلو هېوادونو په اقتصادي وده کې مرسته وکړي.»
په هرات کې د ښځو د سوداګرۍ او صنایعو خونې مشرې، بهناز سلجوقي وویل: «موږ له ایران سره په سوداګرۍ کې خپلې هڅې پیاوړې کړې دي او اوس تمه کېږي چې د دواړو هېوادونو د ښځو ترمنځ سوداګري پیل شي.»
بلخوا، ایراني ښوونکو په هرات کې د مصنوعي ځیرکتیا په مرسته د بازارموندنې، خاورین لوښو جوړولو او سرامیک په برخو کې له ۳۰۰ څخه زیاتو افغان ښځو ته روزنیز ورکشاپونه جوړ کړي دي. دا ورکشاپ په هرات کې د ایران د قونسلګرۍ په کلتوري څانګه کې جوړ شوی او موخه یې د ښځو او نجونو د مهارتونو لوړول او د هغوی د محصولاتو لپاره نړیوالو بازارونو ته د لاسرسي موندل دي.
د دغه ورکشاپ تنظیمونکې، سوسن کاظمي وویل: «په دې روزنیزه دوره کې له ۳۰۰ څخه زیاتو ښځو ګډون کړی او موخه یې د دغو ښځو اړتیاوو ته رسېدنه ده.»
تمه کېږي چې په هرات کې د ښځینه متشبثینو د ظرفیت لوړولو لپاره د ایراني ښوونکو لخوا نور روزنیز پروګرامونه هم جوړ شي. په ورته وخت کې، د افغانستان او ایران ګډه سوداګرۍ خونه وايي چې په افغانستان او ایران کې به د دواړو هېوادونو د ښځینه متشبثینو د تولیداتو ګډ نندارتونونه هم زیات شي.
یوې متشبثې، ژیلا سلطاني وویل: «دا خورا ښه ده ځکه چې موږ به وکولای شو خپل محصولات په خپله وپلورو.»
د روزنیزو ورکشاپونو د ښوونکو په وینا، په نږدې راتلونکي کې به ډېرې دندې له منځه لاړې شي او مصنوعي ځیرکتیا به یې ځای ونیسي؛ له همدې امله د ښځینه متشبثینو لپاره اړینه ده چې له مصنوعي ځیرکتیا سره د کار کولو لپاره اړینې پوهې او مهارتونه ولري.